Heroine Offer to Young Lady: హీరోయిన్‌ చేస్తానని యువతిని నమ్మించి.. ఆఫీస్‌కు పిలుచుకొని అసభ్యంగా తాకుతూ..!

ఓ యువతికి సినిమాలంటే మక్కువ. ఎలాగైనా తనను వెండితెరపై చూసుకోవాలన్న కోరిక బాగా ఉండడంతో హైదరాబాద్‌కు వచ్చిన ఓ యువతి స్నేహితురాలితో కలిసి ఉంటోంది. పలు సినిమా ఆఫీసులకు తిరుగుతూ అవకాశాల కోసం వెతకసాగింది. ఇదే అదునుగా భావించిన ఓ యువకుడు ఆ యువతిని హీరోయిన్ చేస్తానని చెప్పి, తన కార్యాలయానికి పిలిపించి అసభ్యకరంగా ప్రవర్తించిన నిందితుడిపై ఫిలింనగర్‌ పోలీస్‌స్టేషన్‌లో కేసు నమోదైంది. పోలీసులు తెలిపిన వివరాల ప్రకారం సినీ నటి కావాలని ఆశతో ఓ యువతి ఇటీవల హైదరాబాద్‌కు వచ్చి తన స్నేహితురాలి వద్ద ఉంటోంది. సినిమాల్లో అవకాశం ఉందని, హీరోయిన్‌ను చేస్తానంటూ ఈ నెల 18న జీఎం రవి అనే యువకుడు ఆమెను మాదాపూర్‌కు పిలిపించాడు.

అక్కడకు వెళ్లిన తర్వాత ఆమెను పలు విధాలుగా పరీక్షించి ఫిలింనగర్‌లోని దుర్గాభవానీనగర్‌ వద్ద ఉన్న గ్రీన్‌మార్ట్‌ ఆఫీసుకు సాయంత్రం రమ్మన్నాడు. దీంతో ఆమె తన స్నేహితురాలిని తీసుకుని గ్రీన్‌మార్ట్‌ ఆఫీసుకు వెళ్లి రవిని కలిసింది. ఆయన తన గదిలోకి పిలిపించి టెస్ట్‌ పేరిట అసభ్యకరంగా ప్రవర్తించాడు. తనతో పాటు తన స్నేహితురాలితో కూడా అనుచితంగా వ్యవహరించాడని, సినిమాల్లో వేషం పేరుతో, తనను పరీక్షల పేరుతో ఇష్టానుసారంగా తాకుతూ ఇబ్బంది పెట్టాడంటూ బాధితురాలు ఫిర్యాదు చేసింది. ఫిలింనగర్‌ పోలీసులు ఈ ఘటనపై కేసు నమోదు చేసుకుని దర్యాప్తు చేస్తున్నారు.